Ш.Болормаа хэмээх уран гарт бүсгүй шүр сувд буюу гарын доорхи материалаар торгон утсан урлал урлаж, хэрэглэгчдэдээ хүргэсээр буй. Түүний бүтээл бүхий л насныхны гоё болж чаддагаараа онцлог бөгөөд давуу талтай. Тиймдээ ч тэрбээр үйлчлүүлэгчдийнхээ хүссэн загварт нь нийцүүлэн богино хугацаанд ур хийцийн өндөр түвшинд хийж өгч олон охид бүсгүйчүүдийнхээ гангарааг олонтаа нэмж яваа авьяаслаг нэгэн билээ.
-Охид бүсгүйчүүдийн гоёл чимэглэл болох торгон утсан урлалаараа юуг харуулахыг зорьж явдаг вэ?
-Даяаршиж буй өнөө үед 100% ижилсэхгүйгээр гадны үйлдвэрлэгч орны материалуудаар монгол үндэснийхээ соёлын хэв шинжтэй гоёл урлах нь миний туйлын гол зорилго. Өөрөөр хэлбэл торгон утсан урлал хэмээх юмхнаар юм хийж болох урлалын бас нэгэн төрлийг таниулан хөгжүүлж, үүгээрээ дамжуулан хойч үеийнхэн маань гарын ур дүйтэй, гоо сайхны мэдрэмжтэй болоосой гэж хүсдэг. Монгол хүн бүрийн генд аливааг хурдан сурах тууштай хийж хөгжүүлж гайхалтай амжилтанд хүрэх хүч, чин эрмэлзлэл бий гэдэгт итгэдэг. Урлалын маш олон төрөл байдаг ч орчин үеийн шинэлэг нэгэн урлалаар гоёж болно шүү дээ. Жишээ нь монгол эмэгтэйн оройвч гэж толгойн гол нь уламжлалт аргаар урлахад таван кг цагаан мөнгө болон байгалийн үнэт чулуу шүр сувд орсноороо маш үнэтэй болдог. Үүнийг музейн үзмэрт л харах боломжтой. Харин бид орчин үеийн боломжийн үнэтэй гоёмсог материал ашиглан оройвч урлах нь бага зардалтайн дээр хөнгөхөн, хайрахгүйгээс гадна өөрийн хүссэн өнгө хэлбэр хэмжээ дизайнаар урладаг гээд маш их ач тустай. Мөн эх дэлхийдээ ээлтэй урлал юм.
-Бүтээлийнхээ донж маягийг нь тохируулахаас эхлээд сэтгэлгээ ч их шаарддаг байх даа?
– Тийм шүү, Аливаа зүйлийг хараад дуу алдаж нүд баясч сэтгэл сэргээхийн гол нууц нь өнгөний зохицол дараа нь хэлбэр хийцний нарийн нандин хэв маяг байдаг гэж боддог. Монголчууд бид шаргал арьстай хүмүүс. Өөрөөр хэлбэл дулаан тоннтой арьстай өнгөтэй гэсэн үг. Тэгэхээр бидний дийлэнх олонхид дулаан өнгийн хувцас ээмэг зүүлт зохих ёстой. Ялангуяа бүсгүйчүүд уруулаа дулаан өнгийн будгаар будвал илүү үзэсгэлэнтэй, залуухан цог жавхаатай харагдана. Ихэнхдээ хүмүүс энэ миний дуртай өнгө гээд сонгоод авчихдаг ч тэр нь зохидоггүй тохиолдол олон. Иймд миний зүгээс өнгөний зохицлоо олох, хэлбэр хэмжээгээ тааруулах гээд олон талаас нь судалж бодож гоёлоо урлахыг зорьдог. Мөн насны онцлог, нүүрний хэлбэр, хувь хүний санал хүсэлтийг хүндэтгэх хэрэгтэй. Заримдаа байгаа материалдаа захирагдах үе ч бий. Аль болох донжийг нь олж тунг нь тааруулахыг хичээдэг.
-Бүтээлийн нэр төрлийн тухайд?
-Ээмэгний хувьд урт богино, унждаг хатгадаг, хавчдаг тохдог гээд олон янз. Хүзүүний зүүлт урт богино дундын хэмжээтэй байна. Энгэрийн зүү, бөгж, бугуйвч, Бүсний төрөлд нарийн уядаг, өргөн дэгээддэг, мөн унжлагатай, унжлагаа салгаад бүс болдог, унжлагаа угсраад шанх болдог зэргээр хийдэг.
Өдөр болгон л шинэ гоё санаа ундраад байдаг. Саяхан титэм урлаж үзсэн. Үнэхээр гоё болсон. Захиалсан эгч маань маш их баярлаж байна лээ.
-Энэ чиглэлээрээ ямар нэг сургалт явуулж байна уу?
-Одоогоор сутаж урлалын анхан шатны үндсэн анги болон оройвч урлаж сурах онлайн ангийн хичээлүүдээ ороод байна. Завтай үедээ оройвчны захиалгуудаа урлаж байна. Удахгүй бүс хийж сурах ангийнхаа хичээлийг бэлтгэх төлөвлөгөөтэй байгаа.
– Хил гааль хаалттай энэ үед материал хомс байгаа. Тиймээс хийе гэсэн бүтээлээ урлах боломжгүй жаахан баригдмал тал байгаа байх?
-Хил хаагдаад хотод байгаа том жижиг олон дэлгүүрийн бараа материалууд,түүний өнгө, хэмжээ, хэлбэрийн сонголт цөөрч байна л даа. Гэлээ гээд бид гар хумхиж суулгүй, байгаа материалаа ашиглан юм болгох ухаанаа сийлж сурах хэрэгтэй. Угаас монголчууд бид өөрсдийн хүнстэй, өөрсдийн хувцастай, өөрсдийн ахуйтай_ тэнгэрт ивээгдэж газартаа тэтгэгдсэн экологийн өндөр соёлтой ард түмэн учраас өнөөг хүртэл монголоороо оршин байгаа нь бидний давуу тал. Тийм учраас бид өөрсдөө хийж чаддаг байсан бүхнээ хийж чаддаг байгаасай гэж хүсдэг. Цаашилбал, бие даан амьдрах аргатай болоосой ч гэж боддог. Иймийн тулд миний бие өөрийн чадах чинээгээр хүчээ нэмэрлэх ухаанд суралцаж яваа залуусын нэг л дээ.
-Удахгүй сар шинийн баяр тохионо. Энэхүү монгол ёс заншилтай баяраа угтаж ямар урлал шинээр урлах төлөвлөлөөтэй байна вэ?
– Шинэ жилээр сургалтаа заагаад урлалд зав гарсангүй дээ. Харин сар шинийн баяраар сутажаар гурван төрлийн бүс хийж хэрэглэгч нартаа санал болгох төлөвлөгөөтэй байгаа.
-Бүтээл тэр дундаа урлагийн бүтээл хийж байгаа гэдгээрээ ажиллагаа ихтэй. Энэ хэмжээгээр хэрэглэгчдээсээ урмын үг сонсч явдаг нь дамжиггүй?
– Сутаж урлалаараа гоёл чимэглэл урлахаас гадна нэг гайхалтай уран бүтээл хийх санаагаа олчихсон зураад л туршиж үзээд л байна. Мөн сутаж урлалын ном бөгөөд видео заавартай цахим ном хийх зорилготой байгаа. Олон хүмүс дэмжиж урам өгч байгаад талархаж байна. Онлайн ангийнхаа суралцагч бүсгүйчүүдийнхээ хийсэн гоёлуудаас маш их урам авч тэднийхээ баяр талархал дунд умбаж сууна. Ялангуяа гэр бүлийнхэн маань хамгийн их дэмжиж тусалж улам их зүйлийг хийж бүтээх хүч нэмж байгаад баяртай байна. Энэ мэтээр шавь нартайгаа хамтраад номоо хийх, онлайн оффис ажиллуулах, цахим дэлгүүр нээх зэргээр мөрөөдлийн жагсаалтаа гаргаад байж байна даа.
Сэтгүүлч Д.Нэргүй
